တစ်နေ့က ကားကို သစ်ပင်တစ်ပင်အောက်မှာ ရပ်ထားမိတယ်။ သစ်ပင်မှာ တွယ်နေတဲ့
> ဆူးနွယ်ခြောက်တွေက ကျိုးကျပြီး ကားပေါ် လာတင်နေတယ်။ ဆူးတွေကို လက်နဲ့
> ယူမပစ်ချင်တော့ ကားထွက်ရင် သူ့အလိုလို လျှောကျသွားမယ်လို့ ထင်ပြီး
> ဆူးတွေကို မဖယ်မိခဲ့ဘူး။
>
>
> ဒီနေ့မှာ ခင်ပွန်းက ကားဘီး ဆူးစူးလို့ ပေါက်သွားတဲ့အကြောင်း လာပြောတော့
> ကျွန်မ အံ့သြသွားတယ်။ ခင်ပွန်းက ဆူးကိုပါ နှုတ်ပြီး ကျွန်မကို လာပြတယ်။
> ဆူးက တကယ့်သေးသေးလေး... ကားဘီးရဲ့ အပါးဆုံးနေရာကို ကွက်တိပဲ စူးဝင်နေတယ်။
>
>
> ၀ပ်ရှော့သွားပြတော့ ကားပြင်ဆရာက အပါးဆုံးနေရာကို စူးမိလို့
> ပြန်ဖာမရနိုင်တဲ့အကြောင်း၊ ပြန်ဖာရင်လဲ ဖိအားဒဏ်ကို မခံနိုင်ဘဲ
> ဘီးပေါက်နိုင်ကြောင်း၊ ဘီးတစ်ခုလုံး လဲလိုက်ဖို့ သင့်ကြောင်း
> အကြံပေးပါတယ်။
>
>
> စင်တီမီတာ တစ်ဝက်တောင် မရှိတဲ့ ဆူးတစ်ခုက ထူထည်းတယ်လို့ ထင်ရတဲ့
> ကားဘီးတစ်ခုကို ဖျက်ဆီးနိုင်ခဲ့တယ်။ ခင်ပွန်းက ဆူးကိုတွေ့တော့ အမှတ်တမဲ့
> ဆွဲနှုတ်လိုက်တာနဲ့ ကားဘီးထဲက လေထွက်သံကို ကြားလိုက်ရသတဲ့။ လေယိုတာ
> နှေးပေမဲ့ လေတွေ အကုန်ထွက်သွားရင် ကျွန်မတို့ ဒုက္ခရောက်တော့မယ်။
> ဒါကြောင့် လေမလျှော့ခင် ၀ပ်ရှော့ဆီ အမြန်မောင်းခဲ့ရတယ်။
>
>
> အဲဒီ ဆူးလေးတစ်ချောင်းကို ကျွန်မ စိတ်ထဲ မှတ်ထားလိုက်ပြီး ဘယ်လောက်ပဲ
> ခိုင်မြဲတဲ့ ခင်မင်မှု၊ ချစ်ခင်မှုပဲ ဖြစ်ပါစေ သူငယ်ချင်း၊
> လင်မယားတွေကြားမှာ ဆူးစူးနိုင်တဲ့ ပျော့ညံ့တဲ့ နေရာတစ်နေရာတော့
> ရှိနိုင်တယ်လို့ ကိုယ့်ကို သတိပေးလိုက်မိတယ်။ ကိုယ်ပြောလိုက်တဲ့ စကားက
> ဘာမှ မဖြစ်ပါဘူးလို့ ထင်ပြီး ဆူးတစ်ချောင်းလို ပေါ့ပေါ့မထားသင့်ဘူး။ ဘာမှ
> မဖြစ်လောက်ဘူးလို့ ထင်ထားတဲ့ ဆူးတစ်ချောင်းက ကားဘီးလို ထူထည်းတဲ့
> ချစ်ခင်မှုကိုတောင် ပျက်ဆီးသွားစေနိုင်တယ်လေ။
>
>
> လူလူချင်း ဆက်ဆံရာမှာ ကိုယ်က ပျော်တတ်၊ ခင်တတ်လို့ အမှတ်တမဲ့ပဲဖြစ်ဖြစ်၊
> တမင်သက်သက်ပဲဖြစ်ဖြစ် နောက်ပြောင်လိုက်တဲ့ စကားတစ်ခွန်းက သူတစ်ပါးရဲ့
> ပျော့ညံ့တဲ့နေရာ၊ အလေးထားတဲ့ အရာကို တိုက်ရိုက်သွားထိခိုက်တာနဲ့
> တူနေတတ်တယ်။ အဲဒီအချိန်မှာ ချစ်ခင်မှုလေတွေ တဖြေးဖြေး လျှော့သွားပြီး
> နောက်ဆုံး လုံးဝ မရင်းနှီးတော့တဲ့ သူစိမ်းအသွင် ပြောင်းသွားနိုင်တယ်။
> ကားဘီးကို အသစ်တစ်ခုလဲလို့ ရသလို သူငယ်ချင်းကိုလဲ အသစ်လဲယူနိုင်ပါတယ်။
> ဒါပေမဲ့ အဟောင်းနဲ့အသစ်က ဘယ်လိုမှ တူနိုင်တော့မှာ မဟုတ်ပါဘူး။
>
>
> အနှစ်နှစ် အလလ တည်ဆောက်ခဲ့တဲ့ ချစ်ခင်မှု၊ ကြင်နာမှု တံတိုင်းကြီးကို
> သေးငယ်တဲ့ ဆူးကြောင့်ဖြစ်ဖြစ်၊ ကြီးမားတဲ့ ဆူးကြောင့်ဖြစ်ဖြစ် မစူးမိစေတာ
> အကောင်းဆုံးပါ။ မနက်ဖြန် ဘာဖြစ်မယ်ဆိုတာ ဘယ်သူမှ မသိနိုင်ဘူးလေ။
MHS ဆိုဒ် မှ တိုက်ရိုက်ကူးယူဖော်ပြပါသည်။
စာဖတ် ပရိသတ်များကို အစဉ်လေးစားလျှက်
မောင်စေတန်
No comments:
Post a Comment